F’Mejju 2022, il-Kummissjoni Ewropea pproponiet liġi li se tagħmilha obbligatorja għall-fornituri tas-servizzi li jivvalutaw ir-riskju ta’ abbuż sesswali tat-tfal fuq il-pjattaformi tagħhom u, fejn meħtieġ, jimplimentaw miżuri preventivi. Meta l-prevenzjoni ma tkunx tista’ tnaqqas riskju sinifikanti, il-fornituri jistgħu jiġu ordnati wkoll iwettqu kontrolli mmirati għall-abbuż sesswali tat-tfal fuq il-prodotti u s-servizzi tagħhom u jirrapportaw il-każijiet lil ċentru ddedikat ġdid tal-UE. F’ħafna sitwazzjonijiet, il-fornituri huma l-uniċi li jistgħu jidentifikaw l-abbuż, peress li t-tfal huma żgħar wisq jew imbeżża’ wisq biex jirrapportawh u l-ġenituri jew il-persuni li jieħdu ħsiebhom jew ma jindunawx jew ikunu dawk li fil-fatt jabbużaw minnhom. Meta jiġi identifikat abbuż sesswali tat-tfal online, dan jgħin lill-pulizija tidentifika u ssalva lill-vittmi, tiżgura li l-immaġnijiet u l-videos tal-abbuż tagħhom jitneħħew malajr, u tressaq il-predaturi sesswali quddiem il-ġustizzja. Fil-qosor, din il-liġi se tgħin biex tipproteġi lit-tfal, tappoġġja lill-vittmi, u ssalva l-ħajjiet.
Il-liġijiet attwali mhumiex biżżejjed
Din il-liġi hija kruċjali fil-prevenzjoni u l-ġlieda kontra l-abbuż sesswali tat-tfal minħabba li s-sistema attwali ta’ prevenzjoni, detezzjoni u rapportar volontarji li xi fornituri tas-servizzi online implimentaw mhijiex effettiva. Xi kumpaniji jieħdu azzjoni komprensiva, filwaqt li l-biċċa l-kbira ftit li xejn jieħdu azzjoni. Dawn il-lakuni fl-azzjoni jfissru li hemm spazji miftuħa għal min jabbuża u r-riskji għat-tfal, u l-abbuż jibqgħu mhux identifikati. Bħalissa, il-kumpaniji huma liberi li jiddeċiedu li jibdlu l-politiki tagħhom fi kwalunkwe ħin, u dan jista’ jkollu impatt sinifikanti fuq it-tfal.
Kif taħdem id-detezzjoni tal-abbuż sesswali tat-tfal online
It-teknoloġija li tidentifika l-abbuż sesswali tat-tfal online ilha tintuża madwar id-dinja kollha għal aktar minn 10 snin. Din tħalli l-frott, hi effettiva u preċiża. It-teknoloġija ma taqrax messaġġi u ma timmonitorjax ritratti u videos. Minflok, tikkonverti l-kontenut kollu f’kodiċi u tqabblu ma’ kodiċi li jappartjeni għal kontenut ta’ abbuż sesswali tat-tfal irrapportat preċedentement u ma’ indikaturi oħra biex jiġi identifikat l-abbuż sesswali tat-tfal. Jekk ikun hemm tqabbil, il-kontenut jiġi mblukkat u rrapportat. Bħal kelb xammiem li jkun qed ifittex id-drogi f’bagalja, dan ixomm biss is-sustanzi illegali, u ma jimpurtahx mill-bqija tal-kontenut tal-bagalja u lanqas mill-identità ta’ sidha.
Ir-regoli l-ġodda tal-UE dwar il-ġlieda kontra l-abbuż sesswali tat-tfal online se jipproteġu l-privatezza tal-utenti kollha u se jgħinu lill-vittmi jirkupraw il-privatezza tagħhom billi jwaqqfu l-immaġnijiet u l-videos tal-agħar mumenti tagħhom milli jiċċirkolaw fuq l-internet. Id-detezzjoni tal-abbuż sesswali tat-tfal se ssegwi mill-qrib ir-regoli eżistenti dwar il-protezzjoni tad-data u r-regoli dwar il-privatezza tal-komunikazzjoni. Barra minn hekk, il-liġi se tiżgura li s-sistemi ta’ detezzjoni jintużaw biss biex jinstab u jiġi rrapportat l-abbuż sesswali tat-tfal online.
Xerred il-kelma
L-għan tal-UE huwa li din il-liġi ssir realtà sa Awwissu 2024. Jekk il-liġi ma tgħaddix sa dak iż-żmien, ir-regolament attwali tal-UE se jiskadi, u dan jagħmel il-biċċa l-kbira tad-detezzjoni tal-abbuż sesswali tat-tfal online impossibbli u għalhekk ikun aktar faċli għall-predaturi biex jabbużaw sesswalment mit-tfal mingħajr konsegwenzi.
Tgħallem aktar dwar il-leġiżlazzjoni tal-UE għall-prevenzjoni u l-ġlieda kontra l-abbuż sesswali tat-tfal u għinna nxerrdu l-kelma.
Dettalji
- Data tal-pubblikazzjoni
- 1 Diċembru 2022
- Awtur
- Direttorat Ġenerali għall-Migrazzjoni u l-Affarijiet Interni