Patt dwar il-Migrazzjoni u l-Ażil

X’inhu l-Patt dwar il-Migrazzjoni u l-Ażil?

Il-Patt dwar il-Migrazzjoni u l-Ażil hu sett ta’ regoli ġodda li jiġġestixxu l-migrazzjoni u jistabbilixxu sistema komuni tal-ażil fil-livell tal-UE, li tagħti riżultati filwaqt li tibqa’ bbażata fuq il-valuri Ewropej tagħna.

Hu jibni fuq proposti ta’ riforma preċedenti fil-qasam tal-migrazzjoni u jemendahom, filwaqt li joffri approċċ komprensiv li għandu l-għan li jsaħħaħ u jintegra l-politiki ewlenin tal-UE dwar il-migrazzjoni, l-ażil, il-ġestjoni tal-fruntieri u l-integrazzjoni. B’regoli sodi iżda ġusti, hu mfassal biex jiġġestixxi u jinnormalizza l-migrazzjoni fit-tul, filwaqt li jipprovdi lill-pajjiżi tal-UE bil-flessibbiltà biex jindirizzaw l-isfidi speċifiċi li jiffaċċjaw, u s-salvagwardji meħtieġa biex jipproteġu lin-nies fil-bżonn.

Fl-10 ta’ April 2024, il-Parlament Ewropew ivvota favur ir-regoli l-ġodda dwar il-migrazzjoni, segwiti mill-adozzjoni formali tagħhom mill-Kunsill tal-UE, fl-14 ta’ Mejju 2024, li jippermettu lill-UE tindirizza kwistjonijiet kumplessi b’determinazzjoni u b’inġenwità. Dan se jiżgura li l-Unjoni jkollha fruntieri esterni b’saħħithom u siguri, li d-drittijiet tan-nies ikunu garantiti, u li ebda pajjiż tal-UE ma jitħalla waħdu taħt pressjoni.

Ara l-viżwali ta’ daqs sħiħ

L-erba’ pilastri tal-politika l-ġdida dwar il-migrazzjoni u l-ażil

Fruntieri esterni siguri

Skrinjar robust: Dawk li ma jissodisfawx il-kundizzjonijiet biex jidħlu fl-UE se jiġu rreġistrati u soġġetti għal identifikazzjoni, sigurtà, u kontrolli tas-saħħa.

Il-bażi tad-data Eurodac dwar l-ażil u l-migrazzjoni: Ir-Regolament Eurodac jibdel il-bażi tad-data eżistenti f’bażi tad-data sħiħa dwar l-ażil u l-migrazzjoni, filwaqt li jiżgura identifikazzjoni ċara ta’ kull min jidħol fl-UE bħala persuna li tfittex l-ażil jew migrant irregolari.

Proċedura fil-fruntiera u ritorni: Se tapplika proċedura obbligatorja fuq il-fruntiera għal applikanti għall-ażil li x’aktarx ma jkollhomx bżonn protezzjoni, iqarrqu bl-awtoritajiet jew jippreżentaw riskju għas-sigurtà. Ritorni effiċjenti b’appoġġ għar-riintegrazzjoni se japplikaw għal dawk li mhumiex eliġibbli għall-protezzjoni internazzjonali.

Protokolli ta’ kriżi u azzjoni kontra l-istrumentalizzazzjoni: Ir-Regolament dwar il-Kriżijiet jipprovdi protokolli rapidi ta’ kriżi, b’appoġġ u finanzjament operazzjonali, f’sitwazzjonijiet ta’ emerġenza.

Skeda informattiva - Fruntieri esterni siguri

Proċeduri rapidi u effiċjenti

Regoli ċari dwar l-ażil: Ir-Regolament dwar il-Ġestjoni tal-Migrazzjoni tal-Ażil jiżgura determinazzjoni effettiva ta’ liema pajjiż tal-UE għandu jkun responsabbli għat-trattament ta’ applikazzjoni għall-ażil.

Il-garanzija tad-drittijiet tan-nies: Id-Direttiva dwar il-Kundizzjonijiet ta’ Akkoljenza tistabbilixxi standards armonizzati fl-UE kollha, li jiżguraw kundizzjonijiet tal-għajxien adegwati għal dawk li jfittxu l-ażil, filwaqt li ssaħħaħ is-salvagwardji u l-garanziji u ttejjeb il-proċessi ta’ integrazzjoni.

L-istandards tal-UE għall-kwalifiki tal-istatus ta’ refuġjat: Ir-Regolament dwar il-Kwalifika jsaħħaħ u jarmonizza l-kriterji għall-protezzjoni internazzjonali u jiċċara d-drittijiet u l-obbligi tal-benefiċjarji.

Prevenzjoni tal-abbużi: Ir-Regolament dwar il-Proċedura tal-Ażil jistabbilixxi obbligi ċari ta’ kooperazzjoni għal dawk li jfittxu l-ażil, u jipprevedi konsegwenzi f’każ ta’ nuqqas ta’ konformità.

Skeda informattiva - Proċeduri rapidi u effiċjenti

Sistema effettiva ta’ solidarjetà u responsabbiltà

Qafas ta’ solidarjetà permanenti: Il-qafas il-ġdid jiżgura li l-pajjiżi tal-UE jirċievu s-solidarjetà meħtieġa. Il-pajjiżi tal-UE jagħżlu kif se jipparteċipaw, bejn rilokazzjonijiet, kontribuzzjonijiet finanzjarji, appoġġ operazzjonali, tnaqqis fit-talbiet, u “kumpensi għar-responsabbiltà”.

Appoġġ operazzjonali u finanzjarju: L-Aġenziji tal-UE rilevanti u l-fondi ddedikati tal-UE se jappoġġjaw lill-pajjiżi tal-UE f’kull pass fit-triq.

Regoli aktar ċari dwar ir-responsabbiltà għall-applikazzjonijiet għall-ażil: Ir-regoli l-ġodda jtejbu l-kriterji ta’ responsabbiltà li jiddeterminaw il-pajjiż tal-UE responsabbli għall-valutazzjoni ta’ applikazzjoni għall-ażil.

Prevenzjoni ta’ movimenti sekondarji: L-applikanti għall-ażil iridu japplikaw għall-protezzjoni internazzjonali fil-pajjiż tal-ewwel dħul tal-UE u jibqgħu hemm sakemm jiġi ddeterminat il-pajjiż responsabbli għall-applikazzjoni tagħhom.

Skeda informattiva - Sistema effettiva ta’ solidarjetà u responsabbiltà

Integrazzjoni tal-migrazzjoni fi sħubijiet internazzjonali

Prevenzjoni tat-tluq irregolari: Kapaċitajiet imsaħħa tal-awtoritajiet tal-ġestjoni tal-fruntieri f’pajjiżi sħab ta’ prijorità, inkluż permezz ta’ kooperazzjoni msaħħa mal-Frontex.

Ġlieda kontra l-faċilitazzjoni tal-immigrazzjoni illegali: Sħubijiet Operazzjonali ddedikati u mfassla apposta kontra l-Faċilitazzjoni ta’ Dħul Klandestin mal-pajjiżi sħab u mal-aġenziji tan-NU jindirizzaw il-faċilitazzjoni ta’ dħul klandestin f’postijiet ewlenin.

Kooperazzjoni dwar ir-riammissjoni: L-iżvilupp tal-migrazzjoni legali jimxi id f’id ma’ kooperazzjoni msaħħa dwar ir-ritorn u r-riammissjoni.

Promozzjoni ta’ perkorsi legali: Riżerva ta’ Talent tal-UE tistabbilixxi l-ewwel pjattaforma għall-UE kollha biex tiffaċilita r-reklutaġġ internazzjonali, filwaqt li s-Sħubijiet ta’ Talent jippermettu liċ-ċittadini mhux tal-UE jaħdmu, jistudjaw u jitħarrġu fl-UE.

Skeda informattiva - Integrazzjoni tal-migrazzjoni fi sħubijiet internazzjonali